Kolorovana ptica (film)
"Kolorovana ptica" (češ.: Nabarvené ptáče) jest češsko-slovačsko-ukrajinsky črnoběly vojenny dramatičny film češskogo režisera Vaclava Marhula, ktory byl izdany v 2019 roku.[1] Film jest adaptacija jednonazvanogo romana Ježi Kosinskogo, "Kolorovana ptica" (ang.: The Painted Bird).[2][3] Jest prvy film, ktory vključaje medžuslovjansky jezyk.[4] Marhul glasil, čto on rěšil koristati medžuslovjansky, da by nijedin slovjansky narod ne opoznal sebe v jego historiji.[5]
Pověst
V neizvěstnoj česti Vozhodnoj Evropy v času Drugoj světovoj vojny juny mladec žive so svojeju tetkoju. Poslě jej neočekyvanoj smrti mladec slučajno žže jih dom i ostavjaje jego. Jego slědne prigody sut red strašnyh sustrěč s negramotnostju, eksploatacijeju i nemoralnostju. V prvom selu, v ktoro on prihodi, jego kupovaje stary lěčitelj, ale pozdněje jego vinet za nesčestje i kydajut v rěku. Potom jego berut mlynar i jego žena. Mladec vidi, kako mlynar izdolbaje oči hlapca, ktory prědže gleděl na jego ženu, i odběgaje od njih. Poslě on strěčaje Leha, pticevoda, ktory obhodi se s njim dobro. Leh imaje seks s dikoju ženoju, ktoru městne seljanky potom žestoko nasilovajut. Poslě togo Leh věšaje se. Mladec odhodi.
Mladec nahodi krotkogo konja s slomjenoju nogoju i bere jego do slědnogo sela, kde seljan ubije konja. Kosačska kavalerija prinudžajut seljanov prědati mladca němečskym nacistam, ibo v njem videt jevreja. Němečsky soldat, ktoromu govoret ubiti mladca, osvobadžaje jego. Potom jego lovet straži Šucštafelja, ktore privodet jego v městny grad, ale jego iznova spasajut od razstrěla. Městny duhovnik bere mladca, ale potom razměščaje jego žiti s městnym mužem Garbosom, ktory jest pedofil. Mladec ubivaje Garbosa. Poslě smrti duhovnika jego zaměnu ne interesuje sudba mladca i on izběgaje iz grada.
Mladca potom bere k sobě Labina. Kogdy jej stary otec umiraje, ona prinudžaje mladca k seksualnym aktam s njeju, udarjajuči jego, kogdy on čtokoli ne može izdělati, i izsmějivajuči jego črěz simulaciju seksa s kozoju. Mladec potom odplačaje jej ubijstvom kozy i metańjem jej glavy v okno Labiny prěd běgstvom iz jej doma.
Mladec kontaktuje Črvenu armiju. Jedin iz sovětskyh vojinov, snajper Mitka, rěšaje začasno opekati jego. Mladec vidi, kako Mitka ubivaje několikyh městnyh ljudij v karu za napad na sovětskyh vojinov. Kogdy sovětsko vojsko izhodi bojevati, oni posylajut mladca v sirotišče, kde on jest jedinec i několikokratno probuje izběgti. Jego izbivaje městny prodavec-antisemit, ktorogo on ubivaje v mstě. Muž Nikodem prihodi v sirotišče, s solzami pozdravjaje mladca kako svojego syna, i bere jego do doma. Mladec odkazyvaje govoriti. Nikodem probuje objasniti, čemu oni poslali mladca k jego tetkě, i mladec gněvno protestuje. Nikodem zapytaje, pomni li mladec hot svoje ime, ale mladec ne odpovědaje. Nikodem zasne v avtobusu, v ktorom oni jedut do doma. Jego syn priměčaje tatuovano čislo na rukě otca i piše svojim prstom na avtobusnom oknu svoje ime, Joska.
Spis aktorov
- Petr Kotlar — Joska
- Nina Šunevič — Marta
- Ala Sakalova — Olga
- Udo Kir — mlynar
- Mihaela Doležalova — žena mlynara
- Stellan Skarsgord — Hans
- Harvi Kejtel — duhovnik
- Džulian Sands — Garbos
- Julia Vidrnakova — Labina
- Leh Dyblik — Leh
- Aleksej Kravčenko — Gavrila
- Bari Peper — Mitka
- Petr Vaněk — Nikodem
- Radim Fiala — kozak
- Jitka Čvančarova — Ludmila
- Aleksander Leopold Šank — straž Šucštafelja
- Aleksandr Minajev — vojin Črvenoj armije
- Pavel Kříž
- Zdeněk Peha — rabotnik
- Milan Šimaček — vlastnik konja
- Martin Nahalka — črveny partizan
- Dominik Veber — kapitan
- Andrej Poljak — lěkar v sirotišču
- Filip Kankovsky — prodavec
- Lukaš Hložek
Iztvorjenje
Iztvorjenje filma načeli v marecu 2017 i trvali 16 měsecev. Filmovanje dělali v Čehiji (Kuřivody, Brno, Brněnska tjurjma, Jozefov, Bezdružice, Černošín, Kácov i Boletice), Slovakiji (na rěke Váh), Poljskě i Ukrajině. 43 městopoloženja bylo koristovano v filmovanju za 100 dnjej, podčas ktoryh snjali 236 scen, 1520 snimkov i 3531 dublej. Iztvorjenje dokončili v oktobru 2018 roka.
Iztočniky
- ↑ "The Painted Bird: Stellan Skarsgård on the film's 'brutal violence'". BBC News (na anglijskom). Data dostupa: 11 septembra 2020.
- ↑ "Stellan Skarsgard to Star in Holocaust Drama 'The Painted Bird'". The Hollywood Reporter (na anglijskom). Data dostupa: 22 februara 2018.
- ↑ Strbova, Denisa. "PRODUCTION: Václav Marhoul Starts Shooting The Painted Bird". www.filmneweurope.com (na anglijskom). Data dostupa: 22 februara 2018.
- ↑ ""Раскрашенная птица" – кинодебют межславянского языка". Radio Praha (na russkom). Data dostupa: 28 januara 2019.
- ↑ "Nabarvené ptáče aneb Bolestivé pochybnosti o poslání živočišného druhu Homo sapiens". Kinobox.cz (na češskom). Data dostupa: 2 septembra 2019.
Vněšnje linky
- Stranica o filmu na sajtu Jana van Steenbergena
- Tutoj članok imaje prěvod iz članka "The Painted Bird (film)" v Vikipediji na anglijskom (spis avtorov; dozvoljeńje CC BY-SA 4.0).