Напады 11 септембра 2001

Iz Medžuviki, svobodnoj enciklopedije
(Bylo prěadresovano iz Napady 11 septembra 2001)
Jump to navigation Jump to search
Терористичне напады 11 септембра(вресења) 2001 года
Од врха на дол: Пожар во Всесвєтовом Трговом Центру; Разрушена чест Пентагона; Лет 175 влетаје в јужну вєжу ВТЦ; Пожарны(гаситељ) проси помоч на Граунд Зиро; Чест мотора самолета (лет 93); Лет 77 разбиваје се об Пентагон
Мєсто нападаСША: Њу Јорк
Цєљ нападаВсесвєтовы Трговы Центр (ВТЦ), Пентагон, Бєлы дом/Капитол
ДатаВторок
11 септембра(вресења) 2001 года
8:46 — 10:28
Способ нападаЗахват самолета, терористичны акт-самоубијство
Оружје2 самолеты Boeing 757-200 и 2 самолеты Boeing 767-200
Убити људи2977
Порањени људиПриблизно 6300
Коликост убијцев4
УбијциПилоти-терористи:
Подзрєни

Терористичне напады 11 септембра (вресења) 2001 года, такоже знане како 9/11, јест серија из четырєх координованых терористичных актов-самоубијств в США, кторе были учињене терористичноју организацијеју Ал-Каида.

Јутром 11 септембра (вресења) 2001 рока четыри групы терористов (всего 19 људиј) захватили четыри пасажерске самолеты. Кажда од 4 груп имєла хот бы једного члена, кторы прошел почетково летно приготовјенје. Терористи уставили курс самолетов на вєже ВТЦ. Лет 11 American Airlines ударил вєжу ВТЦ-1 (сєверну), а лет 175 United Airlines влетєл в вєжу ВТЦ-2 (јужну). В резултату обє вєже порушили се, одломкы вєж учинили силну шкоду будынкам поблизу. Третји самолет (лет 77 American Airlines) взел курс на Пентагон, кторы находи се недалеко од Вашингтона. Пасажери и команда четвртого самолета (лет 93 United Airlines) дали одпор терористам и усиловали вратити контрол над самолетом, самолет спадл в пољу поблизу боро Шанксвилл в штату Пенислванија.

Кромє 19 терористов вслєд терористичных актов погынули 2977 људиј, јешче 24 људиј пропадли. Бољшест убитых људиј была мирными граджанами. Терористичне напады 11 септембра(вресења) стали највечшими терористичными актами в свєту по числу жртв.

Послє терористичных актов США и државы-члени НАТО почели «Војну против тероризму», главным цєљем кторој стало унишченје Ал Каиды и Талибана в Афганистану и Пакистану и инвазију США и јих сојузников в Ирак, вслєд кторој в Ираку был свргнуты режим Саддама Хусејна.

Терористичне акты

Мапа, на кторој је можно видєти реконструкцију терористичного акта. Чрвеными линијами сут означене трајекторије упада одломков самолетов.

Событја одбывали се приблизно тако: подчас полета терористи сут овладнули четырєми пасажерскыми самолетами, кторе были повинне летєти в Калифорнију од аеропортов Логан, Даллес и Њуарк. Все самолеты имали в баках близ 30-35 тысечиј литров палива тому, же долгост планујемых полетов была около 4200 километров.

  • Лет 11 American Airlines, самолет Боинг 767-223ER, летны номер N334AA, влетєл в сєверну страну сєверној вєже (ВТЦ-1) меджу 94—98 етажами, приблизно в 8:46:26 —8:46:40 јутра по мєстному часу.
  • Лет 175 United Airlines, самолет Боинг 767-222, летны номер N612UA, влетєл в јужну страну јужној вєже (ВТЦ-2) в 9:02:59, меджу 78—85 етажами. Туто событје было записано множством телевизијных каналов, кторе сут записывали послєдства удара првого самолета в сєверну вєжу.
  • Лет 77 United Airlines, самолет Боинг 757-223, влетєл в Пентагон в 9:37:46 јутра.
  • Лет 93 United Airlines, самолет Боинг 757-222, летны номер N591UA, спадл в пољу, в јужно-западној чести Пенсилваније, близ боро Шанксвилл в 10:03:11. Мєсто упада самолета находи се 240 километров сєвернєје Вашингтона. Прєдположитељно, самолет спадл вслєд борбы пасажеров самолета и терористов. Когды терористи сразумєли, же они не могут совладнути с пасажерами и совршити терористичны акт, они направили самолет в земју.
Лет United Airlines 175 влетаје в јужну вєжу Всесвєтового Тргового Центра

В резултату ударов самолетов порушили се три будынка од комплекса Всесвєтового Тргового Центра (ВТЦ). Јужна вєжа (ВТЦ-2) порушила се приблизно в 9:56, послє пожара, кторы трвал 56 минут. Сєверна вєжа порушила се в 10:28 послє пожара, кторы трвал 102 минуты. Вєжа ВТЦ-7 порушила се в 17:20 в резултату серије избухов газа и пожара.

Јужна вєжа ВТЦ починаје падати. Врхна чест вєже падаје под кутом (вуглом) односно нижној чести вєже.

Жртвы

Жртвами терористичного напада стали сут 2977 људиј (не считајучи 19 терористов): 246 пасажеров и членов екипы самолетов, 2606 људиј в Њу-Јорку, на земји и вєжах ВТЦ, 125 в Пентагону. Погынули сут граджани США и јешче 91 државы.

Жртвы(без терористов)
Њу Јорк ВТЦ 2606
American 11 87
United 175 60
Арлингтон Пентагон 125
American 77 59
Шанксвилл United 93 40

Шкода

Подчас порушенја двох вєж силну шкоду достали и друге будынкы поблизу. Достали силну шкоду або были унишчене таке будынкы како Всесвєтовы Трговы Центр 7, Всесвєтовы Трговы Центр 6, Всесвєтовы Трговы Центр 5, Всесвєтовы Трговы Центр 4, хотел Мариотт Всемирного Тргового Центра и православна гречска Црква в имену Светого Николаја. Будынок Deutsche Bank, кторы находил се поблизу вєж ВТЦ, был силно пошкоджен подчас упада вєж и јего рєшили сносити. Сносити будынок Deutsche Bank'а почели в 2007 року и скончили в 2011.

Вест-стрит 90 и Верајзон-билдинг тож были силно пошкоджене, але јих смогли реконструовати. Средњу шкоду сут достали Всесвєтовєтовы Финансовы Центр 3, Уан-Либерти-Плаза и хотел Millenium Hilton.