Praslovjansky jezyk

Praslovjansky ili Protoslovjansky jezyk (skračeny - PS; takože Občeslovjansky) jest nepodtvrdženy, rekonstruujemy protojezyk slovjanskoj galuzi indoevropejskoj jezyčnoj rodiny. On prědstavjaje slovjansky govor priblizno od 2-go tysečlětja prěd Hristom do 6-go stolětja za Hristom. Kako i ini rekonstruujemi jezyky, ne imaje podtvrdženyh pisemnyh žrl; učeni sut rekonstruovali jezyk s priměnenjem sravniteljnogo sposoba ko vsim podtvrdženym slovjanskym jezykam i s uvaženjem inyh indoevropejskyh jezykov.

V času protoslovjanskogo perioda, sběgšego se s masovym razširjenjem slovjanskogovorečej městnosti, slučilo se skoro razvivanje slovjanskogo govora. Dialektično različenje slučilo se v toj period rano, ale obča jezyčna jednost i vzajemna razumlivost trvali v času několika stolětij, do 10-go věka ili vyše pozdno. V času togo perioda mnoge zvukove izměnenja razširjahu se po cěloj teritoriji, često ravnoměrno. To dělaje neudobnym poddrživanje tradicijnoj definiciji protojezyka ako najpozdnějšego občego prědka jezyčnoj grupy bez dialektičnogo različanja. (To by potrěbovalo razgledanja vsih panslovjanskyh izměnjanij za 6-ym stolětjem ako čest oddělnoj historiji raznyh dočernjih jezykov.) V zaměn slovjanisti obyčno razgledajut cěly period dialektično različajemogo jezyčnogo jedinstva ako občeslovjansky.