Sbornik:2011.06.25 Julija Timošenko prěd sudom (Jan van Steenbergen)
It is not released under Creative Commons Attribution-ShareAlike 3.0 license until its authors will explicitly say so.
⁘ Julija Timošenko prěd sudom ⁘ Julija Timošenko pred sudom | |
---|---|
Avtor: | Jan van Steenbergen |
Prěvod: | prvobytno medžuslovjansky |
Iztočnik: | Izvěsti.info (byv. Izvěstija) [1] |
Doba stvorjenja: | 25.06.2011 |
Byvša prvy ministr Ukrajiny, Julija Timošenko, je v petok stanula pred sudom v Kijevě. Ona je obvinjena v tom, že v časě svojego premierstva je zloupotrěbjala vlasť i pronevěrila državne pěnezy, za čo grozi jej deseť lět vezenja. Sama Timošenko nazyva toj proces «farsoju i cirkom».
Glavnoju težboju protiv 50-lětnoj Timošenko je to, že dogovory o gazě, zaključene s Rosijeju v 2009, sut pričinili utraty dlja ukrajinskogo državnogo skarba. Timošenko, jedna iz tyh, koje sut počeli pomarančevu revoluciju v 2004, ostro kritikuje proces. Jejnym mněnjem je go nadohnul prezident Viktor Janukovič aby otišiti opoziciju. Jestli ona bude osudžena, ona – kako pokarana osoba – v slědujučim godě ne može kandidovati v izborah. Vlada odkyda obvinjenje, že proces ima političnu motivaciju.
Prěd procesom Timošenko je pověděla žurnalistam: «Nikto ne sumněva odnosno togo, že sudy i prokuratura sut v privatnyh rukah, i že ne bude spravědlivosti.» Odpovědajuči na pytanja ona ne je vstala, a potom je žedala uvoljnjenje suditelja, kojego je nazvala «pionom v rukah prezidentskogo aparata» i obvinila, že je česť sistema «političnyh represij, rukovodženyh od strany vlady».
Okolo tyseč ljudi je demonstrovalo prěd budynkom suda, aby izraziti podpor dlja vodžice opozicije. Oni sut nosili transparanty s napisami, kak: «Glas Juliji je glasom naroda», «My budemo braniti Ukrajinu», «Govorimo NE političnym represijam». Někoje jejne stranniki sut daže vošli v salu, kričeči gasla.
V 2008 godě Ukrajina je platila 179,50 dolarov za 1000 m3 rosijskogo gaza. Poslě konflikta medžu Rosiju i Ukrajinoju o gazě, Timošenko je se dogovorila s rosijskom premier-ministrom Vladimirom Putinom, že Ukrajina bude platiti novu cěnu 450 dolarov. Soglasno sejčasnoj vlady toj dogovor byl dlja Ukrajiny nekoristny.