Sbornik:2012.03.18 Kto je neprijateljem Rosije? (Gabriel Svoboda)
It is not released under Creative Commons Attribution-ShareAlike 3.0 license until its authors will explicitly say so.
| ⁘ Kto je neprijateljem Rosije? ⁘ Kto je neprijateľèm Rosiji? | |
|---|---|
| Avtor: | Gabriel Svoboda |
| Prěvod: | napisano medžuslovjanskym |
| Iztočnik: | http://izvesti.info/politika-ekonomija/211-kto-je-neprijatelem-rosiji |
| Doba stvorjenja: | 18 marec (brězenj) 2012 |
V vrěmeně rosijskih prědvybornyh debat, prezidentske kandidaty Mihail Dmitrijevič Prohorov i Vladimir Voljfovič Žirinovski ne byli sòglåsne ob tom, kto sųt potencialnymi prijateljami i neprijateljami jih krajiny. Miliarder Prohorov glåsil, že Rosiji je trěba dalějša integracija s Evropojų, ale Žirinovski, prědsědatelj nacionalističnoj Liberalno-Demokratičnoj Partije Rosije, izstųpal za bližějše svęzki s slovjanskymi bratami Ukrajinojų i Bělorusijų i prěduprědžal od neprijateljev, na priměr zapadnyh držav, Kitaja i Japonije.
"Tutčasno tri globalne srědišča formujųt sę: Sjedinjeně Štaty s Latinskojų Amerikojų, Kitaj s Indijejų i inymi azijatskimi krajinami, i Rosija s Evropojų," skazal Prohorov. Ni Rosija ni Evropa ne bųdųt možne stojati licem protiv konkurenciji v novom světovom porędku, i za to on zaključil, že "Evropa je našim strategičnym partnerom." Je trěba, daby Rosija i Evropska Unija zakončili vizy i stvorili jediny ekonomičny prostor — moćno ekonomično prostrånstvo.
V odnošenju k južnym sųsědam Rosije, Prohorovova politika byla by točno protivna: strogějše granicne kontroli i regulacija viz, daby unemožlivili trgovjų narkotikami i nezakonno prěselenje. "To je jedina prava politika dlja našej krajiny," on dodal. Prohorov skazal, že nedemokratične i neprijateljske režimy, gde ljudske prava narušajųt sę, na priměr Iran i Sirija, sųt potencialnymi neprijateljami Rosije. "Ale nam je vsegda trěba råzvažati interesy Rosije. Zagranična politika je instrumentom našego råzviťja."
Žirinovski skazal, že Sjedinjene Štaty, jih evropejske sòjųzniky, Kitaj, Japonija i Turcija sųt neprijateljami Rosiji za to, že oni hćųt "izničiti našų krajinų". Medžu inymi prijateljami Rosiji on imenoval Ukrajinų, Kazahstan, Běloruś, Bulgarijų, Armenijų i "Korejų".