Sbornik:Po zlosti pijanicam (Michał Swat)

Iz Medžuviki, svobodnoj encyklopedije
Jump to navigation Jump to search
⁘ Po zlosti pijanicam ⁘
Avtor: M. Swat
Prěvod: Poem prvobytno medžuslovjanskym pisany
Noe Schnapsbrennkessel.jpg

Prišli do mę někògda
Pivo, vodka a voda,
A govoręt: "Izpij si!
Hoćeme služiti ti!"
No ja jesm byl po večerji
Pozdno jesti ne dobro mi.
"Ja ne mogų" rěkl jesm za to
"Trěh izpiti, pozdno tako..."
Pa vòzmų[1]/ samo jednogo
Noćejų bųde mi blågo

Itak stojųt tri napitky:
Ględam: pivo, pozor bridky
Žòlte cěle, pòlno pěny
Napitòk može hvaljeny
Čehi go pijųt bòčvami
No nehaj go pijųt sami
Ja ne hćų. Berj je kto iny
Pivo v tom ne ima viny.

Smotrjų: vot obyčna vodka
Slavna i cělo neslådka
Može byh jų mogl izpiti
No bųde vnųtri gorěti
Može noć ili tòž dvě
Napoj sej ne za mene
Za čto piti śakų moć
Kògdy blizko už je noć?

No naprotiv mę jest voda
Voda vsegdy sily doda
A vkųs v njej tòž ne jestvuje:
Zlogo vkųsa ne počuješ
Voda hlådna, voda čista
Vody litrov pij i trista
Voda ne zatemni glåvy
Voda ne ujme ti slavy
Dobra jest na vśako brěmę
Vodų piti sejčas vrěmę

Voda čęsťejų telese
Napojem jest iz nebese
Bože, dękujų da mogų
hvala Bogu, piti vodų
Dneś ne hoćų alkoholja
Ibo taka moja volja
Tym čto hćeli by inako
Ja naprotiv rěkam tako:
Medžu "vodka" a "voda"
Jest jedino bukva "ka"
Hoti ne jesm inozemcem
Vody bųdų bral dneś grncem
Ibo takų žędžų imam
Vodų v grupě ili sam
Po zlosti pijanicam

Objasnjenja[praviti | praviti kod]

  1. tom poemě jest upotrěbjano sěvernoslovjansko bųdųćno vrěmę