Sbornik:Putovanje v Srbiju, 16 avgusta 2011 (Andrej Moraczewski)
It is not released under Creative Commons Attribution-ShareAlike 3.0 license until its authors will explicitly say so.
| ⁘ Putovanje v Srbiju ⁘ | |
|---|---|
| Avtor: | Andrej Moraczewski |
| Prěvod: | pisano medžuslovjanskom[1] |
16 avgusta 2011.
Belgrad
Tutdenj byli jesmo v Novom Belgrade, točneje, na ušće. To je veliky prijetny park, kafe i izvestny na cely grad trgovy centr togo že imeni. V trgovom centre provedli jesmo premnogo vremeni. Byvali jesmo na ostrove Ada Ciganlija (nema ničego s ciganami!), to je dobro mesto za odpočinok i kupanje v Dunave. Posetili jesmo Zemun, koji ranje byl samostojnym gradom, a dnes je česťju Belgrada (kak Perovo i Babuškin v Moskve). Zemun shranil stary tihy centr s nizkymi domami, koji jesm poljubil od mahu. Glavna ulica Zemuna tak se i zove: Glavna.
Na stene jednogo doma našli jesmo načrtany obraz Vladimira Putina s napisom: «Putin is watching you». Divno je, že srbi tak ljubet Putina, že vsaka beseda s srbom se počina od: «Kako se Putin ima?» Už v temnote byvali jesmo bliz Belgradskogo Universiteta: pravny fakultet, kde se učet Jovana i Jadranka, i tehničsky fakultet. Bliz poslednogo stoju pametnik Tesly: kak srbi, tak i hrvati myslet jego narodnym herojem.
Bliz universiteta se razmešča jedna od dvoh stancij belgradskоgo «metro». Napravdu, to ne je metro, a samo podzemna železnična stancija, kde se obstanavjajut predgradne vozy (naprimer, v Pančevo). Ale ta stancija je stvorjena s koristanjem sovetskyh tehnologij i izgleda velmi podobno s našimi moskovskymi stancijami metro. Lift je russkogo proizvoda, i vozy sut tako že proizvoda sovetskogo Rižskogo RVR (specialny jugoslavsky projekt ER-31, koje sut neformalno imenovane «gorbačevy»). Kogda se spuščali na stanciju, hotel jesm idti v kasu, ale Jovana mi obstanovila: «Za čo tobe kupovati bilet, kogda nikudy ne jedeš?» Na moje udivjenje, vojdti na stanciju možno bez karty.
Večerom imali jesmo mnogo zabavy i veselja daže bez alkohola. Imali jesmo i muzičnu besedu. To se okazalo, že Jovana i Miťaj imajut nekoje odnošenje do hipsterov, to je: slušati vsaku muziku, koja ne je mainstream. Paradoks takogo pogleda je že kogda nekaki pevatelj ili grupa stavajut izvestnymi, hipsteram je treba prestati jih slušati. Različno od njih, ja i Jadranka imamo spolny vkus do staroj i sovremennoj pop-muziky i jednako nenavidimo mrzky turbofolk.
Objasnjenja[izměniti | izměniti kod]
- ↑ Ov tekst jest osovrěmennjena versija teksta iz foruma ZetaBoards, ktory byl pisany na starših versijah medžuslovjanskogo