Vojcěh Jaruzeljski
Vojcěh Vitold Jaruzeljski (pol.: Wojciech Witold Jaruzelski; 1923–2014) byl poljsky general i politik, ktory kratko byl prezident Poljsky.
Žitje
Jaruzelski urodil se dvorjanskoj rodině 6 julija 1923 v Kurovu. Na početku Drugoj světovoj vojny on s otcem byli izgnani do Siberije, kde jegov otec umrl. Od 1943 goda on vojeval kako oficer v Prvoj poljskoj armiji, ktora byla čest Črvenoj armije, v maršu k Berlinu. Poslě vojny Jaruzelski stal člěn Poljskoj komunističnoj partije i prodolžal svoje vojinsko obrazovańje. Vnutri komunističnoj partije (ktora od petdesetyh lět nazyvala se Poljska objedinjena rabotničska partija – PZPR) on stal direktor političnogo odděla vooruženyh sil. Pozdněje on stal podministr Narodnoj Obrany i od 1956 byl general. V 1964 godu Jaruzelski stal člěn Centralnogo komiteta PZPR-a. V 1968. Jaruzelski stal ministr Obrany i suglasil se s invazijeju Varšavskogo dogovora v Čehoslovakiju. Od 1970 goda on takože nalěžal k Politbjuru partije i byl ministr vnutrnyh děl.
Vodž Poljsky
V fevruaru 1981 g. Jaruzelski stal premier Poljsky. V oktobru togože goda naslědil Stanislava Kanju kako prvy sekretar partije i tym sposobom svezal dvě močne pozicije v državě i v partiji. 13 dekembra 1981, poslě vvedenja vojennogo stana, on stal prědsědnik vojennoj hunty, prvoj komunističnoj hunty v historiji. Profesionalny sojuz Solidarnost Leha Valesy byl zabranjeny i reformy byli odvračene. Jednakože Jaruzelski načel liberalizovati spoločenstvo i vvesti reformy v sistemu, hoti povtarjal, že PZPR jest povinna igrati veduču rolju. V 1985 godu Jaruzelski stal prědsědnik Državnogo Sověta (= glava državy) i odpustil vojenny stan. V slědujučih lětah Jaruzelski vse bolje tratil kontrolj nad krajem.
Prěhod k demokracije
Lětom 1988 goda odbyval se Krugly stol medžu vladoju i opozicijeju, reprezentovanoju od Solidarnosti i Valesy. V rezultatu tyh konferencij profesionalne sojuzy byli legalizovane i od 1989 iztvorjenje političnyh partij bylo dozvoljeno. Jaruzelski prědstavil novu konstituciju, ktoru prijeli i komunistična partija i Solidarnost. Suglasno toj konstituciji komunisti iměli pravo na polovinu + 1 vsih měst v Sejmu. V prvyh svobodnyh izborah v 1989 g. Solidarnost izigrala vse města v novom Senatu i vse svobodno izbrane města v Sejmu, ale PZPR vse vrěme iměla množinstvo v Sejmu. Jaruzelski sejčas byl izbrany prezidentom Poljskoj Narodnoj Republiky i odstupil kako prvy sekretar partije. On takože odšel iz partije, ibo kako prezident byl bezpartijny.
Prezidentstvo Jaruzelskogo trvalo kratko: on ne učestnil v prvyh demokratičnyh prezidentskyh izborah v dekembru 1990 i od 22. dekembra togože goda Leh Valesa byl novy prezident Poljsky.
Jaruzeljski umrl 25 maja 2014 goda v Varšavě.